Hazrollaj për Rapidin: “Tifozët e jashtëzakonshëm, futbolli në nivel tjetër”

Futbollisti i ri i Rapidit të Bukureshtit, Drilon Hazrollaj, në ditët që ishte në vizitë te klubi i tij i ri për ndeshje kampionale, ka shfrytëzuar rastin dhe ka folur për faqen e klubit dhe mediat rumune në përgjithësi.

Drilon Hazrollaj, njëri ndër lojtarët më të mirë në Superligë të Kosovës që aktualisht luan për Malishevën dhe do të përfundojë stinorin 2024/25 aty, ka nënshkruar këto ditë me Rapidin, ndërsa ekipi i Malishevës që drejtohet nga trajneri Bekim Isufi do të fitojë në total 900 mijë euro nga transferi i tij.

Sipas informatave në media, parakontrata e nënshkruar mes Rapidit dhe Hazrollajt do t’i sjellë Malishevës menjëherë 150 mijë euro, ndërsa deri në verë ekipi i Superligës bashke me bonuse do të përfitojë 900 mijë euro në total prej rumunëve.

Hazrollaj 21 vjeçar kështu bëhet rekord transferi i Superligës së Kosovës në histori, ndërkaq vetë lojtari që luan në krah të djathtë dhe ka depërtime dhe driblime të shpejta pritet me entuziazëm në Bukuresht, duke ditur cilësitë e tij. Driloni është transferi i radhës për në Rumani, pas disa lojtarëve të Superligës që kaluan atje dhe ky shtet, që ende nuk e ka njohur Kosovën si shtet, vazhdon të jetë ura më e rëndësishme aktualisht e kalimit të lojtarëve nga vendi ynë për më tutje në Evropë.

“Ndjehem mirë. Jam shumë i lumtur që jam këtu. Ky është transferi i parë në karrierën time. E kam shikuar Rapidin më parë, projektin, gjithçka. Kam qenë më herët në ndeshje të Rapidit kur Albioni, Ermali e Florenti ishin pjesë e klubit. Kam biseduar me Albionin, e kam shok të mirë. Më ka treguar në klubin në detaje. Tifozët janë të jashtëzakonshëm, nuk kam parë gjë të tillë në karrierën time. Jam në nivel tjetër,” ka thënë ai për faqen zyrtare të klubit të Rapidit.

“Luaj në krah. Kam qejf të dribloj dhe të shënoj. Dua të shënojë në secilën ndeshje. Këtu është nivel tjetër në krahasim me Kosovën, intensiteti është më i lartë. Por, unë adaptohem shpejt. Albioni më ka treguar se ka shumë presion këtu, e mua më pëlqen të luajë ku ka presion. Në stinorin e kaluar ekipi im u kualifikua për në gara evropiane, shënova 25 gola në kampionat, ka qenë vit tepër i rëndësishëm për mua,” ka shtuar futbollisti i lindur në Banjë të Malishevës, që më 19 shkurt të këtij viti mbushi të 21-tat.

Këtë stinor në Superligë, Drilon ka shënuar 9 gola dhe 2 asistime. Ai është ftuar nga Kosova, ndërsa në synim e ka edhe Shqipëria. Mbetet të shihet se si do të shkojnë punët deri në fund sa i përket karrierës për kombëtare të lojtarit. Dribluesi i dalluar i Superligës prej verës bëhet pjesë e Rapidit, ndërsa kontrata e nënshkruar e tij vlen deri në stinorin 2028/29 me mundësi vazhdimi edhe për një stinor tjetër. Malisheva gjithashtu ka klauzolë prej 15% fitim të shitjes së radhës të lojtarit!