Në Prizren, të maten mirë!

Skuadra e Sigkos Bashkimit në derbin e parë të stinorit pranveror u mposht nga Peja me rezultat 81-76. Ekipi nga Prizreni megjithëse tregoi lojë të mirë, në fund nuk mundi t’i shmanget humbjes me rezultat 81-76.

“Kemi luajtur lojë të mirë. Në disa raste kemi qenë edhe shumë më të mirë se Peja. Por në minutat e fundit ra përqëndrimi ynë sidomos në mbrojtje dhe kjo doli të jetë fatale për ne,” ka thënë pas ndeshjes kapiteni i Sigkos Bashkimit, Valentin Spaqi, në intervistën e tij për Borozani.com.

Askush s’do ta ketë lehtë ndaj Bashkimit, në praninë e tifozëve tanë - Valentin Spaqi, kapiten i Bashkimit

Ndërsa në pyetjen se çka mendon për ndeshjen e radhës, ku ekipi i tij do ta pret Sigal Prishtinën në Prizren, Spaqi tha: “Jo veç Sigal Prishtina, po cila do skuadër që do të vijë në Prizren duhet të matet mirë. Askush nuk do ta ketë lehtë kundër neve në praninë e tifozëve tanë”.

Valentin Spaqi ishte njëri ndër basketbollistët më të dalluar në ndeshjen kundër Pejës. Ai takimin e përmbylli me 14 pikë, ku 12 prej tyre i shënoi jashtë vijës 6.75 metra. Bashkimi gjendet në pozitën e tretë të renditjes së BKT Superligës, pas Pejës dhe Sigal Prishtinës.