Derbi i finalistëve

Pas derbit të mbrëmshëm në Karagaç të Pejës, ndërmjet Pejës dhe Bashkimit xhiroja e XVIII e BKT Superligës do të sjellë sonte edhe një derbi të madh të basketollit kosovar atë ndërmjet Sigal Prishtinës dhe Trepçës. 

Sigal Prishtina e cila humbjet e vetme këtë stinor i ka pësuar nga Peja (dy herë) do të kërkojë të vazhdojë serinë e fitoreve ndaj Trepçës, derisa me kthimin nga lëndimi të Edis Kurajës, nuk ka ndonjë mungesë të theksuar në skuadër. 

Në anën tjetër kampioni aktual i BKT Superligës dhe fituesi i Kupës së Kosovës, Trepça, e cila ende nuk e ka fituar asnjë derbi në TOP katërshe këtë stinor, vuan për një fitore për të kthyer vetëbesimin dhe për të vërtetuar forcën. 

Në ndeshjet e deritashme të këtij stinori, Sigal Prishtina ka mposhtur dy herë Trepçën. Mirëpo, nëse shikohet forma e basketbollistit më të mirë të vitit të kaluar, Drilon Hajrizi, si dhe kthimi nën kosh i qendrës amerikane, Dennis Mims, Trepça sot do të kërkojë hiq më pak se fitore në kryeqytet. 

Në stinorin e kaluar gjatë kampionatit të rregullt, Sigal Prishtina dhe Trepça, kishin shënuar fitore si vendas duke dalë 2-2 me fitore para Play Offit. Mirëpo, fundi i stinorit ka qenë maestral për mitrovicasit të cilët fituan dy trofetë e baketbollit kosovar. Xehetarët mposhtën Sigal Prishtinën në gjysmëfinale të Kupës, për të fituar pastaj trofeun në finale, si dhe në ndeshjen e fundit të finales së Play Offit ata arritën që të mposhtin kryeqytetasit në folenë e tyre për t’ia marrë titullin nga dora. 

BKT SUPERLIGA, SONTE:

NDESHJET E GJYSMËSTINORIT VJESHTOR: