Nesër, Peja - Trepça

Xhiroja e dhjetë e BKT Superligës në basketboll fillon nesër me tre takime, ku padyshim më interesanti pritet të jetë derbi ndërmjet Pejës dhe Trepçës.

Peja deri më tani ka pësuar vetëm një humbje dhe është lider i kampionatit, derisa kampioni aktual Trepça nuk ka filluar mirë stinorin e mbrojtjes së titullit duke humbur të gjitha ndeshjet derbi ciklit të parë. 

Peja ka 3, derisa Trepça 2 të huaj me të drejtë loje në derbi

Peja së fundi ka regjistruar në radhët e saja edhe qendrën boshnjake Vladan Jocovic, i cili pritet të dominojë nën kosh bashkë me kroatin Zoran Pehar, i cili ende nuk arriti t’i përmbush pritjet e pejanëve. E Dardan Berisha me shokë do të tentojnë të tregojnë se gjithçka në ndeshje me Sigal Prishtinën ka qenë vetëm një ditë jo e mirë për të verdhit.

Në anën tjetër Trepça përveç se dëshiron fitoren e parë në derbi, do të ketë edhe një rast për të testuar të huajt e saj. Denis Mims dhe Jerome LaGrange ende nuk kanë përjetuar atmosferë të derbit dhe paraqitja e tyre me minutazhë të ulët ndaj Kosovës nuk garanton sukses të sigurtë.

Mirëpo lojtari më i mirë i stinorit të kaluar Drilon Hajrizi, i ndihmuar nga gjithnjë më i mirë, Besnik Azemi, kanë treguar se mund të përballen me ekipet e forta - mirëpo u duhet ndihmë sadopak. E kjo ndihmë nga dyshja amerikane mund të befasojë Pejën!

ORARI:

E shtunë:

20:00 Karagaç, Pejë > PEJA - TREPÇA

INFO:

Ndeshja e parë e zhvilluar më 14 tetor: Trepça - Peja 71-84 (0:1)

Sqarim: Ndeshja e parë tregon rezultatin e takimit të parë ndërmjet ekipeve të përmendura, ndërsa rezultati në kllapa tregon fitoret e njërit ndaj tjetrit.