PEJA - BASHKIMI
Peja pa telashe kundër Bashkimit
16 September, 2021 @20:50
Skuadra e Pejës pa u lodhur fare e mposhti Bashkimin me rezultat 86-51.
Peja e nisi ndeshjen furishëm, ku me mbrojtje të fortë pësoi vetëm 5 pikë në çerekun e parë.
Mbrojtja e fortë pejane vazhdoi edhe në 5 minutat e para të çerekut të dytë ku pësuan 2 pikë, por megjithatë Bashkimi filloi të shënojë pikë dhe pjesa e parë përfundoi me rezultat 39-20 për Pejën.
Peja e ngriti epërsinë edhe në çerekun e tretë 63-39, kurse në 10 minutëshin e fundit kontrolli ishte totalisht te djelmoshat e trajnerit Semsettin Bas.
Dardan Berisha shkëlqeu me 26 pikë e 5 kërcime në këtë ndeshje, kurse u ndihmua edhe nga Daniel Lekndreaj me 14 pikë e 20 kërcime dhe Arian Qallaku me 14 pikë të tjera.
Te Bashkimi koshashënuesi më i mirë ishte Edmond Kryeziu me 13 pikë, kurse me pikë dyshifrore luajtën edhe Immanuel King e Valon Bunjaku, me nga 10 pikë secili.
Peja në xhiron tjetër do të takohet me Prishtinën, kurse Bashkimi me Yllin.
