Drita i kthehet fitores, duke fituar derbin me Dabiqajn vendimtar

Derbi i luftuar mjaft nga të dyja palët i ka takuar vendasve. Drita ka shënuar fitoren e tretë kampionale në katër ndeshje të luajtura nga gjashtë xhirot e para të stinorit, duke e mposhtur kampionin aktual, Ballkanin.

Ka qenë mesfushori Albert Dabiqaj që i ka dhënë fitoren Dritës, kur qëlloi me kokë (83’) nga krosimi i Egzon Bejtullait për të shënuar për 1-0 përfundimtare dhe për t’ia shkaktuar humbjen e parë Artim Pollozhanit në krye të Ballkanit, ndërsa humbjen e dytë kampionale suharekasve!

Pas dy rasteve të Dritës në fillim të ndeshjes, ka qenë sulmuesi i ardhur këtë verë te Ballkani, Sunday Adetunji që ka humbur një rast të madh për ekipin e tij! Më pas Ballkanit iu lëndua mesfushori i ri Lindon Emërllahu, që u desht detyrimisht të zëvendësohej kah fundi i pjesës së parë me Marsel Ismajlgecin. Në 20 minutat e fundit të ndeshjes Ballkani luajti me një lojtar më pak në ndeshje, pasi që i posafuturi në lojë Bernard Karrica mori karton të kuq pas një faulimi me bërryl ndaj lojtarit kundërshtar.

TABELA AKTUALE & REZULTATET

Në pjesë të dytë ndeshja edhe më me kontroll nga të dyja palët, të dy trajnerët bënë zëvendësime gjatë periudhës, ndërsa kur dueli u fut në 10 minutëshin e fundit të kohës së rregullt në skenë doli mesfushori Dabiqaj që vulosi fatin e takimit, Drita - Ballkani 1-0 [Albert Dabiqaj 83’].

Me fitore, Drita ka 9 pikë dhe është e gjashta në renditje sot, ndërsa Ballkani me humbjen e dytë sezonale është i katërti dhe ka 10 pikë nga gjashtë ndeshje të luajtura në gjashtë xhirot e para të stinorit.