Për fillim me fitore

Sigal Prishtina nga kryeqyteti i Kosovës dhe Vllaznia e Shkodrës hapin edicionin e radhës në Balkan League sonte. 

Dy ekipe shqiptare hapin edicionin 2014/15 të ligës ballkanike, ku merr pjesë edhe një ekip tjetër kosovar, Peja. 

Derisa Sigal Prishtina do të përjetoj nisjen e edicionit të dytë të BIBL, Vllaznia e Shkodrës do të debutojë në këtë ligë - duke u bërë ekipi i parë nga Shqipëria që merr pjesë në BIBL. 

Për më tepër, edhe trajneri i ri i Sigal Prishtinës, Sabit Hadzic, do të debutojë në ligën ballkanike, derisa në një prononcim për faqen zyrtare të kësaj lige ka thënë se ekipi i tij luan për fitoren e parë të stinorit në këtë ligë dhe atë para shikuesve të vetë të mrekullueshëm. 

“Nisma e mirë në këtë ligë është tepër e rëndësishme për ekipin tonë. Me ndihmën e tifozëve që bëjnë atmosferë fantastike, që na ndihmuan të fitojmë edhe derbin ndaj Pejës në fundjavë, besoj se do të fillojmë me fitore edicionin në BIBL,” ka thënë fillimisht ish trajneri i reprezentacionit të Bosnjes dhe Hercegovinës, Hadzic. 

Më tej ai ka shtuar se Sigal Prishtina ka analizuar lojën e kundërshtarit dhe janë plotësisht të gatshëm për fitore. 

“Kemi parë ndeshjet e Vllaznisë dhe i njohim deri diku. Gjëja më e rëndësishme është se jemi të gatshëm për ndeshje, ku pres të luajmë bukur dhe të fitojmë pasi që jemi vendas,” ka përfunduar boshnjaku, që ende nuk ka pësuar me Sigal Prishtinën në asnjë ndeshje zyrtare të zhvilluar në Kosovë. 

Në ndeshjen tjetër të ditës takohen: Rilski Sport - Sutjeska.