Përfaqësuesja niset për në Estoni

Në prag të miqësoreve ndaj Estonisë, të cilat zhvillohen më 5 dhe 6 gusht, Përfaqësuesja e Kosovës sonte është nisur për në Estoni.

Lajmi u konfirmua nga FBK-ja sot, ndërsa raportohet që pas ndeshjeve me Estoninë, Përfaqësuesja do të rikthehet fillimisht në Prishtinë për disa ditë, për të udhëtuar më pas përsëri për në Como të Italisë, ku do të zhvillohen 5 miqësore ndaj skuadrave të ndryshme nga kolegjet amerikane.

Në fund, Përfaqësuesja e drejtuar nga Arben Krasniqi do të qëndrojë në Qipro për të zhvilluar edhe dy miqësore të fundit ndaj Qipros e Katarit, ndërsa ndeshja e parë kualifikuese drejt Eurobasketit 2017 luhet ndaj Sllovenisë më 31 gusht.

Para nisjes në Talin, përzgjedhësi Arben Krasniqi deklaroi që në miqësore janë zgjedhur kundërshtarë të vështirë, duke marrë parasysh që edhe Grupi E, ku bën pjesë Kosova në kualifikimet drejt kampionatit evropian, ka skuadra mjaft cilësore. Për më tepër ai shtoi:

“Ne do të luajmë kundër Ukrainës, Sllovenisë dhe Bullgarisë në kualifikime për Eurobasket 2017 dhe të gjitha këto janë skuadra me përvojë në gara të tilla dhe gjithashtu të forta në aspektin ekipor. Kjo edhe ishte arsyeja që ne kemi vendosur të luajmë miqësore me Estoninë, Qipron, Katarin, por edhe me skuadra nga kolegje të Amerikës, sepse vetëm kështu mund të dimë ku jemi saktësisht në aspektin e zhvillimit të skuadrës.”