DEKLARATA E TRAJNERIT TË G. E. YLLIT
Përgatitja e mirë na solli fitoren
31 January, 2021 @20:45
Trajneri i Golden Eagle Yllit, Fatih Emre Gezer, në deklaratën e tij pas fitores së vështirë ndaj Vëllaznimit ka thënë se përgatitjet e mira po i sjellin fitoret ekipit të tij.
“Kemi qenë jashtëzakonisht të koncentruar në lojë dhe tejet mirë të përgatitur. Veçanërisht mund të them për këto 3 ndeshjet e fundit,” ka thënë trajneri turk i suharekasve.
“Ne është dashur të luajmë me roster më të shkurtuar, për shkak të lëndimit të Gëzimit [Morina v.j.], por jam i lumtur pasi që mbrojtja është përmirësuar mjaft këto ditë dhe sulmi po përparon,” ka shtuar ai.
Me fitoren e sotme ndaj Vëllaznimit Golden Eagle Ylli ka dalë në vend të parë të renditjes tabelare të Superligës dhe ka bilans 13-6, njëjtë sikurse edhe ndjekësi në hap, Ponte Prizreni.