AFRIM TOVËRLANI
Përgatitja fizike dhe këmbëngulësia deri në fund, solli fitoren
8 March, 2017 @17:22
Trajneri i Feronikelit, Afrim Tovërlani, është shprehur i kënaqur pas fitores së sotme të skuadrës së tij në përballje me Llapin.
Nikli fitoi me rezultat minimal, 1-0, me golin që u shënua në minutën e 90’ të ndeshjes, ndërsa sipas “Tokit”, goli nuk ishte fat dhe erdhi falë përgatitjes më të mirë fizike dhe këmbëngulësisë deri në fund të skuadrës së tij.
“Nuk është fat, është përgatitja fizike dhe këmbëngulësia deri në fund. S’po më intereson kush e shënoi golin, apo ishte auto-gol apo çfarë. Është e pamundur se si edhe me Dritën edhe me Llapin po dëmtohemi për penallti, nëse është e qëllimshme më mirë të na tregojnë, të mos shpenzojmë. Fusha e Drenasit nuk është Banja e Shakovicës m’u shtri çdo minut. 89-shi është me meritë në vendin e parë, por ka ende ndeshje sepse do të kemi takime direkte,” ka thënë Tovërlani.
Kjo fitore e ka ngjitur Feronikelin në pozitën e dytë, menjëherë pas lideres, Trepçës ‘89.
