Ponte Prizreni e quan tendencioz vendimin e Komesarit, paralajmëron padi penale

Klubi i Ponte Prizrenit ka dalë me një komunikatë të re publike, ku ka reaguar lidhur me vendimin e Komesarit të Garave për ndeshjen e ndërprerë për shkak të përleshjes, Ponte Prizreni - Peja.

Siç është bërë e ditur më parë, Komesari i Garave kishte vendosur për ta regjistruar ndeshjen me rezultat zyrtar 20-0 për Pejën, me ç‘rast kjo e fundit kualifikohet direkt në finale, si dhe shqiptoi një sërë gjobash për akterët e përfshirë në incident nga të dyja palët.

Shiko vendimin e Komesarit të Garave

Këtë vendim të Komesarit të Garave, Ponte Prizreni e ka quajtur tendencioz dhe vendim të gatuar, ndërsa gjobën e shqiptuar ka paralajmëruar se nuk do ta paguajë nëse nuk do të ketë transparencë në këtë proces dhe në borxhet e skuadrave të tjera.

Klubi prizrenas gjithashtu ka bërë të ditur se nuk do të ankohen te shkalla e dytë për këtë vendim, ngase beson që kjo nuk do të sjellë rezultat, por do të përgatitet padi penale nëpërmjet avokatit të klubit.

Në fund është hedhur në dyshim edhe vazhdimi i garave në edicionin e ardhshëm.

Më poshtë gjeni komunikatën e plotë:

Pas vendimit të Komesarit të garave, KB PONTE PRIZRENI del me këtë :
                K O M U N I K A T Ë
-Regjistrimi i rezultatit zyrtar 20:0 në favor të KB Peja nga ana e Komesarit të garave Kurshumliu është tendencioz, dhe i një anshëm dhe pa asnjë bazë e argument!.
-Vendimi si duket paska qenë i gatuar nga ai sa që hala pa filluar dita mirë e servoi atë në faqen zyrtare të FBK - së.
- Në të gjitha kompeticionet sportive, në kohën kur ushtrohet dhuna, akterët, lojtarët duhen të ndëshkohen me gabime diskualifikuese, në të njejtën kohë të merren deklarata të të apostrofuarve dhe në raportin shtesë të policisë dhen emergjencës (ndihmës së parë) të merret vendim juridik e jo vendim i tekeve të një personi i cili aq më shumë ka qenë gangrena e basketbollit për sa vite ka qenë Komesar i garave.
- Kërkojmë transparencë se nga i vërtetoi dhe identifikoi zyrtarët si tifozë dhe ku e ka dëshminë që ne ishim iniciatorë.
-Ne si klub kemi dënuar rastin, dhe kërkojmë falje publike ndaj KB Peja dhe ndaj gjithë dashamirëve të basketbollit ku do që janë. Skena të tilla asnjëhere nuk kanë qenë në frymën tonë sportive.
- Po ky komesar ishte ai që prishi edhe raportet mes dy klubeve, i cili peshën e ndeshjes pa i dhënë rëndësi delegoi gjyqtarë jo kualitativ të cilët me menaxhim katastrofik të ndeshjes e paraprijnë që fundi të jetë i dhunshëm edhe si pasojë e përfundimi erdhi: Ekipi kampion i stinorit të rregullt, të diskualifikohet nga gara, ndërsa ekipit mik i pezullon dy lojtarët kyq duke i prishur komplet imazhin e kampionatit që ishte pa dyshim më e mira në historinë e basketbollit.
KB PONTE PRIZRENI nuk do të ankohet në shkallën e dytë pasi se edhe aty, servimi do vjen i njejtë.
Por do angazhojmë avokatin e klubit z. Gent Gjini i cili do pregadisë një padi penale.
-Historikisht sukseset e klubit tonë dhe qytetit të Prizrenit, kanë qenë çdo herë jo të pëlqyera nga Kurshumlia.
-Klubi jonë është gjobitur me afro 6000€, dhe këtu ju konfirmojmë që jemi klubi ndoshta më i përpiktë për kryerjen e obligimeve. Nga arka e klubit nuk do paguajmë asnjë cent për këto dënime deri sa nuk do kemi transparencë se sa të holla kanë borgje skuadrat tjera.
-Ekipeve finaliste ju dëshirojmë suksese në finale, ndërsa së shpejti do dalim me vendimin zyrtar, për vazhdimin apo mos vazhdimin e kampionatit të ardhshëm.
-Nuk do lejojmë që gjithë investimin, djersën e mundin e sponzorëve, lojtarëve ta shuan një njeri.
Prizren 05.05.2021 , Bordi i KB PONTE PRIZRENI