Premtohet organizim madhështor

Befasi të mëdha, organizim i paparë dhe ndeshje interesante - kanë qenë ndër premtimet që janë dhënë nga organizatori i Kupës së Kosovës, Sigal Prishtina sot në konferencën për shtyp para ndeshjeve të Final Fourit. 

“Do të ketë befasi të mëdha. Do të jetë organizim më i mirë i Kupës së Kosovës,” ka thënë ndër të tjera zyrtari i Sigal Prishtinës, Luan Maloku sot para gazetarëve të pranishëm në prag të Final Fourit. 

“As edhe një çelës nuk do të mund të futet në sallë,” ka shtuar ai sa i përket sigurisë që do të ketë në ndeshje. 

Ndërsa ka paralajmëruar edhe tifozët e publikun që dëshirojnë të përcjellin ndeshjet. 

“Do të ishte mirë që të vihet së paku 1 ose 1 orë e gjysëm para ndeshjeve në palestër për të mos krijuar turma të mëdha para kontrollit,” ka shtuar ai. 

Ekipi i Prishtinës ka fituar organizimin e Kupës së Kosovës për herë të parë pas 5 viteve, ndërsa është premtuar një spektakël i paparë më parë nga organizatori. 

Ndeshjet gjysmëfinale të Final Fourit luhen nesër, ndërsa finalet (meshkuj dhe femra) luhen të dielën.