SONTE NDESHJA
Fisnik Rugova (Prishtina) dhe Gazmend Sinani (ish-Bashkimi) në duelin e parë të stinorit mes Bashkimit dhe Prishtinës/ BOROZANI/ A. P.
Prishtina-Bashkimi, sonte në BIBL
16 January, 2017 @10:09
Dueli i sontëm për Sigal Prishtinën ndaj Bashkimit në kuadër të BIBL është jetik. Bardhekaltërit duhet të shënojnë fitore.
Fitorja duhet të jetë me mbi 11 pikë, ndërsa në anën tjetër duhet të shpresojnë në humbje të skuadrave rivale për të shpresuar në kualifikim.
Bashkimi në anën tjetër me këtë ndeshje hap vitin 2017. Te portokallezinjtë që kanë pasur nismën më të mirë të stinorit në Superligë, ka pasur largime të theksuara në skuadër gjatë muajit të kaluar dhe pritet të shihet se si do të reagojnë basketbollistët sonte.
Njejtë, edhe Sigal Prishtina tashmë është dukshëm më e dobët për kah numri i lojtarëve dhe së fundi largimi i Malcolm Rhett flet mjaft. Bardhekaltërit gjithashtu nuk kanë zyrtarizuar ende kryetrajnerin e ri të skuadrës.
Bashkimi, është pak më rehat në kuadër të BIBL me bilanc 4-4, ku në katër ndeshjet e fundit kanë shënuar po aq fitore. Sidoqoftë, edhe ata duhen luftuar për të siguruar kualifikimin në fazë të dytë të BIBL.
FAKT:
| Bashkimi ka shënuar 2 fitore ndaj Sigal Prishtinës këtë stinor në 3 ndeshjet e zhvilluara në të gjitha garat. Sigal Prishtina ka një fitore ndaj Bashkimit. |
