Reagon Peja

As ndeshja e mbrëmshe ndërmjet Pejës dhe Sigal Prishtinës nuk kaloi pa incidente. Takimi, i cili përfundoi me fitoren e pejanëve me rezultat 71-43, organizimin e ndeshjes e kishte në nivel të duhur, mirëpo e gjitha ndodhi pas takimit.

Sipas Fahri Brecës, i cili rrëfeu rastin për Telegrafin, pas ndeshjes autobusi i klubit prishtinas u sulmua nga disa persona të panjohur, me ç‘rast edhe u thyen xhamat dhe u tentua të sulmohen basketbollistët bardhekaltër, ndërsa fatmirësisht asnjëri prej tyre nuk pësoi ndonjë lëndim.

Këtë rast klubi pejan e ka dënuar me anë të një komunikate ku thuhet:

”Është me të vërtetë e hidhur dhe e turpshme që këto gjëra të ndodhin në djepin e basketbollit, në qytetin e Pejës. Raste të ngjashme kishin ndodhur edhe me klubin tonë në Prizren dhe stinorin e kaluar në Prishtinë.”

“I bëjmë thirrje organeve të rendit që sa më shpejtë të merren masat dhe ata që e prishin imazhin e një finaleje fantastike të dalin para ligjit.”

Poashtu klubi i Pejës nëpërmjet kësaj komunikate bëri thirrje për ulje të tensioneve dhe deklaratave të matura nga ana e pjesëtarëve të të dy klubeve.