Temperatura -27º në Karagaç!

Palestra Karagaçi vazhdoi ta mbajë epitetin e palestrës së vetme të pamposhtur në këtë stinor. Kësaj radhe viktima e Karagaçit të mbushur përplot ishte Sigal Prishtina, e cila u turpërua duke u mposhtur nga Peja me rezultat të thellë 71-44.

Prishtina vetëm në çerekun e parë ishte rival i përafërt, pasi e përmbylli këtë çerek me disavantazh prej 4 pikëve 15-11.

Çereku i dytë bëri diferencën

 

Në dhjetëminutëshin e dytë filloi dominimi i plotë i pejanëve. Shqiponjat me lojë të fortë e thelluan epërsinë deri në 17 pikë, për të shkuar në zhveshtore pranë rezultatit 40-23.

Në çerekun e tretë ekipi përveç që arriti ta ruajë epërsinë, e thelloi atë edhe për 3 pikë më shumë (51-31), duke bërë kështu që periudhën e fundit të ndeshjes tifozët e pranishëm ta presin të qetë dhe pa presion.

Mirëpo basketbollistët pejan nuk u ndalën me kaq. Ata e thelluan ende epërsinë e ndaj prishtinasve dhe në fund shënuan fitore me rezultat të thellë prej 27 pikëve, 71-44.

Rezultat afërsisht të tillë ndaj Sigal Prishtinës, Peja kishte shënuar edhe në stinorin vjeshtor, përkatësisht në xhiron e dytë, kur kishte fituar me rezultat 98-67.

 

Peja me pesë, Prishtina me asnjë basketbollist me pikë dyshifrore!

Koshashënuesi më i mirë i takimit ishte i zakonshmi, Dardan Berisha, i cili shënoi 17 pikë dhe ishte i ndihmuar nga bashkëlojtarët e tij, Gerti Shima me 12 pikë, si dhe Ersid Ljuca dhe Alban Veseli me nga 11 sosh.

Ndërsa në anën tjetër, për bardhekaltërit asnjë basketbollist nuk arriti të shënojë pikë dyshifrore, derisa koshashënuesi më i mirë ishte qendra amerikane, Akida McLain, me vetëm 9 pikë.

Peja me këtë fitore kaloi në epërsi 1-0 në serinë finale të playoff-it, duke arritur kështu edhe avantazhin në rezultat, përveç avantazhit të palestrën vendase.

Ndeshja e dytë e finales do të luhet këtë fundjavë në Pallatin e Rinisë dhe të Sporteve në Prishtinë.

Skema e play off-it.

REZULTATI

Peja - Sigal Prishtina

71-44

seria finale (1-0)

PEJA (Statistikat individuale)

1	Dardan Berisha	17 pikë	5 kërcime	3 asistime
2	Gerti Shima	12 pikë	5 asistime	3 kërcime
3	Alban Veseli	11 pikë	7 kërcime	1 asistim
4	Ersid Ljuca	11 pikë	3 kërcime	2 asistime
5	Cyril Awere	10 pikë	5 kërcime
6	Harouna Mutombo	3 pikë	1 asistim
7	Rron Grapci	3 pikë	1 kërcim
8	Vigan Radoni	2 pikë	1 asistim	1 kërcim
9	Valdet Grapci	2 pikë
10	Samir Shaptahovic	0 pikë	5 kërcime	5 asistime

SIGAL PRISHTINA (Statistikat individuale)

1	Akida McLain	9 pikë	7 kërcime	1 bllokadë
2	Granit Rugova	8 pikë	2 kërcime	2 asistime
3	Fisnik Rugova	7 pikë	1 kërcim	1 asistim
4	Edmond Azemi	5 pikë	2 asistime	1 kërcim
5	Fahri Breca	4 pikë	3 asistime	1 kërcim
6	Hekuran Binxhija	4 pikë	2 kërcime	1 asistim
7	Julian Terrell	4 pikë	2 kërcime
8	Adnan Mustafa	3 pikë
9	Leonard Mekaj	0 pikë	1 kërcim