PLAY OFF

BOROZANI/Edrin Shkuliqi

Super finalja fillon sot

15 May, 2013 @9:06

Dyshja padyshim më e fortë e basketbollit kosovar këtë stinor me plotë meritë takohet në finale të Play Offit.

Sonte në Karagaç me fillim prej orës 20:15 fillon seria finale. Peja ka epërsinë e terrenit vendës në rast se shkohet deri në ndeshjen e pestë, për shkak se ka përfunduar stinorin në vendin e parë në renditje tabelare.

Pejanët kanë fituar tre tituj kampioni para luftës në vitet 1994, 1995 dhe 1996 si dhe një titull në kohën kur në vitin 2004 skuadrat luajtën nën ombrellën e ligës private LPBK, jashtë ombrellës së FBK-së. Këto të dhëna do të thonë që Peja është e urritur për titull.

Në anën tjetër, Sigal Prishtina, është padyshim ekipi më i suksesshëm kosovar në vitet e pasluftës (pas 1999) duke marrë tituj e tituj si dhe duke dominuar në basketbollin vendor, që prej vitit 2005 e deri në vitin e kaluar kur Trepça ua morri edhe titullin edhe Kupën (dhe Peja Kupën e vitit 2011).

Pejanët janë të bazuar te dyshja Dardan Berisha - Samir Shaptahovic, ku ky i fundit në ndeshjen e fundit gjysmëfinale shkëlqeu. Mirëpo, ekipi i Rudolf Jugos ka edhe një përparësi, pasi që ka së paku dy lojtarë për çdo pozitë - dhe atë lojtarë kualitativ.

Në anën tjetër, skuadra e Ahmet Kandemirit, është tërësisht e bazuar në lojën kolektive ku me Edmond Azemin (ish basketbollisti më i mirë i Kosovës) si lider ekipor do të tentojnë që së paku të fitojnë një ndeshje në Karagaç, për të kthyer serinë me epërsi në Prishtinë.

Gjatë stinorit të rregullt Peja dhe Sigal Prishtina kanë përfunduar përballjet e tyre me barazim, ku çdonjëra ka fituar nga dy herë në palestrën e vetë.

Përballja e tyre e fundit ishte në finale të Kupës së Kosovës, ku Sigal Prishtina arriti t’i mposht pejanët me vetëm një pikë dallim, që tregon se sa afër janë këto skuadra njëra-tjetrës dhe që duhet të presim super ndeshje në ditët në vijim - derisa të caktohet kampioni i ri i Kosovës, skuadra që e para fiton tre duele.

Shikoni si kanë ardhur skuadrat në finale.