Reprezentuesi i Kosovës, më i miri i muajit në Spanjë

Basketbollisti i përfaqësueses së Kosovës, Scott Bamforth, i cili është pjesë e skuadrës spanjolle, Bilbao Basket, është shpallur basketbollisti më i mirë i muajit tetor në kampionatin e Spanjës.

Efiçienca me mesatare prej 22.8, ka bërë që organizatori amerikan me nënshtetësi kosovare t’i lë pas yjet e skuadrave si Real Madrid e Barcelona.

Bamforth ka zhvilluar 6 ndeshje gjatë muajit tetor dhe ka pasur mesatare prej 17.0 pikëve, 4.5 kërcimeve dhe 4.2 asistimeve për ndeshje, derisa skuadra e tij regjistroi katër fitore dhe dy humbje.

Përndryshe, gjatë ndeshjeve kualifikuese për Eurobasket, Bamforth ishte paraqitur për Kosovën vetëm në ndeshjen e fundit kundër Bullgarisë, pasi zgjedhja e parë e përzgjedhësit Arben Krasniqi për një lojtar të natyralizuar, ka qenë gjithmonë për basketbollistin e Barcelonës, Justin Doellman.