Rhett gjobitet për goditjen e bashkëlojtarit

Basketbollisti i Sigal Prishtinës, Malcolm Rhett, është gjobitur nga FBK sot për goditje me bërryl të bashkëlojtarit të tij.

Në Informatorin e 11 të Superligës së Kosovës, të botuar sot nga FBK-ja, është vërtetuar fërkimi që ka pasur Rhett me bashkëlojtarin e tij Drilon Hajrizi, ndërsa pas gabimit teknik të pësuar, Rhett është gjobitur sot me 50 euro.

“Malcolm Jaleel Rhett për shkak të goditjes me bërryl të bashkëlojtarit të tij gjatë ekzekutimit të gjuajtjes së lirë është ndëshkuar me gabim teknik dhe konform Nenit 50.1 dënohet me 50 euro,” - ka bërë të ditur njoftimi i sotëm i Komesarit të Garave.

Në përgjithësi në xhiron e XI nuk ka pasur derbi të zjarrtë dhe numri i gjobave ka qenë minimal, ku përveç Rhettit është gjobitur vetëm edhe trajneri i Rahovecit, Jeton Nixha, për gabim teknik, me 75 euro.