Rikthim në pjesë të dytë, Vëllaznimi fiton

Pas pjesës së parë që krejtësisht i takoi Don Boskos 27-34, Vëllaznimi ka arritur të rikthehet në pjesë të dytë për të fituar duelin e parë gjysmëfinal të PlayOffit të Ligës së Parë në basketboll.

Dallimi i madh ndodhi në çerekun e tretë, kur gjakovarët u futën në lojë furishëm dhe ndalën mysafirët në 9 pikë, duke u shënuar 22 pikë. Më pas, edhe çereku i katër kaloi në të mirë të Vëllaznimit dhe kështu në fund, me rezultat të përgjithshëm 70-54 Vëllaznimi fitoi ndeshjen.

Vëllaznimi i futet ndeshjes së dytë mes ekipeve me epërsi 1-0 dhe në rast të fitores në ndeshjen e dytë që luhet në vikend, do të arrijë finalen e PlayOffit të Ligës së Parë.

PLAYOFF SKEMA

Më i dalluari te Vëllaznimi sonte ka qenë Ardit Memqaj që ka shënuar 14 pikë, 8 kërcime e 2 asistime. Më efikasi ka qenë Taaj Ridley me 19 pikë të shënuara e 7 kërcime, ndërsa 18 të tjera i ka shënuar Edmond Kryeziu.

Te Don Bosko Gent Shala mbeti më i dalluari me 14 pikë e 15 kërcime përgjatë ndeshjes, pamjaftueshëm për të bërë më shumë në duelin e parë gjysmëfinal.