Shkon edhe Waleskowski

Sigal Prishtina ka mbetur pa njërin prej basketbollistëve më të mirë të skuadrës. Pas largimit të qendrës amerikane, Jeremy Price, rrugën e tij e ndjeku edhe alo qendra, Adam Waleskowski, i cili ka arritur marrëveshje me skuadrën nga kategoria e dytë gjermane, Duesseldorf.

“Waleskowski ka pranuar një ofertë shumë të mirë nga Gjermania dhe nuk do të jetë pjesë e skuadrës sonë në vazhdim të kampionatit. Ai është një basketbollist cilësor dhe besoj se edhe atje do t’i dëshmojë cilësitë e tij,” ka thënë kryetrajneri i Sigal Prishtinës, Arben Krasniqi, për Kosova Sot.

Waleskowski kishte ardhur në Prishtinë për ta zëvendësuar amerikanin, Sylvester Seay, i cili ishte larguar vetëm pas dy xhirove të para në BKT Superligë.

Sigal Prishtina tani në përbërjen e saj e ka vetëm një basketbollist të huaj, plejmekerin Devan Downey, ndërsa së shpejti pritet të vijnë edhe dy përforcime të tjera për ta mbushur hapësirën e zbrazur nga largimi i dyshes, Price - Waleskowski.