Si do të duket Peja në stinorin e ri?!

Ekipet e basketbollit kosovar këtë verë janë shumë më të qeta sesa verën që shkoi. 

Peja, që stinorin e shkuar u bë nënkampione e Kosovës, pasi që humbi në finale nga Sigal Prishtina - do të varet nga buxheti i këtij stinori dhe do të shikohet mundësia për të luftuar për trofe. 

Mirëpo, ajo që premton kryetari i klubit verdhezi, Art Gashi, se ‘fansat më kërkues në vend’ do të mund të shohin spektakël gjatë stinorit. Ku është Peja tash, çka planifikon dhe si do të duket ekipi i saj në stinorin e ri 2014/15 - tregon kryetari i klubit, në 5 pyetjet që do t’i dërgohen të gjitha ekipeve të Superligës para stinorit të ri. 

- Në çfarë fazë është aktualisht ekipi i Pejës kur kemi parasysh përgatitjet parasezonale? 

Gashi: Për momentin KB Peja është duke punuar intenzivisht në rregullimin e strukturave brenda klubit. Gjithashtu, jemi duke punuar në krijimin e disa shërbimeve tjera të marketingut, të cilat do të mund të na sjellin më shumë të hyra në stinorin e ri ashtu që të kemi stabilietet financiar dhe mos të na ndodh e njejta gjë sikurse vitin e kaluar, kur patëm vështirësi financiare. 

Shlyerja e borxheve është çështja primare

- E nga aspketi sportiv? 

Gashi: Ne jemi të vetëdijshëm për obligimet që i kemi nga viti i kaluar dhe shlyerja e tyre është primare. Përgatitjeve mendojmë t’ia nisim në fund të gushtit. Kemi qenë të shtyer të fillojmë më vonë sepse ende nuk i kemi kontratat me të gjithë sponzorët dhe nuk e kemi buxhetin e finalizuar. Mirëpo, mendoj se kjo është e mjaftueshme për përgatitjen e Ligës Ballkanike që nis në mes të tetorit dhe për Superligën e Kosovës, duke ditur forcat reale të skuadrave tjera. 

- Do të vazhdoni me Bujar Locin si trajner, apo keni plane tjera për stinorin e ri? 

Gashi: Bujar Loci stinorin e shkuar e ka marrë klubin në një kohë shumë të vështirë dhe ka bërë aq sa ka mundur për kushtet që i kemi pasur. Këtë stinor, pas finalizimit të Bordit të Klubit, strukturave dhe kontratave me sponzorë, klubi do të vë objektivat dhe në bazë të tyre do të përzgjedhim trajnerin që mendojmë se do ta bëj më të mirën për t’i arritur ato objektiva. 

Përzgjedhja e lojtarëve të rinj do të bëhet me kujdes nga stafi dhe trajneri

- Cilët lojtarë i keni me kontrata dhe sa lojtarë duhen përafruar te Peja para nisjes së stinorit të ri? 

Gashi: Vetëm Drilon Hajrizi prej vendorëve nuk ka kontratë me klubin, si dhe natyrisht të huajt. Të gjithë të tjerët kanë kontratë edhe për një stinor  apo më shumë me Pejën. Pasi që të përzgjidhet trajneri, do të analizojmë se cilët lojtarë do të vazhdojnë me klubin e cilët duhet të largohen. Duke reflektuar mbi atë se çfarë ndodhi në stinorin e kaluar, përzgjedhja duhet të bëhet me kujdes të shtuar nga trajneri dhe stafi i tij. Në fund mendoj se Peja do të ketë përbërje të fortë si gjithmonë, si e meritojnë tifozët tanë. 

Synojmë trofe dhe spektakël basketbollistik

- Synimet e klubit për stinorin e ri?! 

Gashi: Synimet janë të lidhura ngushtë me kontratat për sponzorim. Ne kemi punuar dhe jemi duke punuar shumë në aspketin komercial të klubit dhe këtë stinor presim të afrojmë edhe më shumë sponzorë. Aspiratat janë të njejta, Peja është klub i madh edhe lufton për trofe çdo stinor. Gjithashtu, synim është edhe shfaqja e basketbollit të bukur dhe spektaklit për tifozët. 

- Për tifozët, lojtarët, klubin e basketbollin në përgjithësi…

Gashi: Mendoj që fansat tonë janë fansat më kërkues në vend. Ata gjithmonë dëshirojnë fitore dhe kjo është një gjë shumë e mirë për ne, pasi që na shtyen të punojmë vazhdimisht dhe të bëhemi më të mirë. Shpresoj që këtë stinor Peja do  të jetë më e mirë dhe më e fortë, si dhe do t’ju ofrojë të gjithë dashamirëve të basketbollit Show dhe spektakël sportiv.