Teo Simovic në Pejë

Fillimi jo i mirë në Ligën Ballkanike, ka shtyrë drejtuesit e skuadrës kampione të Kosovës, Peja, që të kërkojnë lojtarë të ri për ta përforcuar skuadrën.

Kështu, verdhezinjtë nëpërmjet faqes zyrtare të tyre, kanë njoftuar se janë përforcuar me qendrën kroate, Teo Simovic.

Basketbollisti 205 centimetra i gjatë, stinorin e kaluar ka luajtur për skuadrën hungareze ZTE KK, ku ka pasur mesatare prej 17.5 pikëve dhe 8.8 kërcimeve, ndërsa së fundi ka qenë pjesë e ekipit Zrinjski nga Bosna dhe Hercegovina.

Ai më parë ka luajtur edhe për skuadra të tjera si Kvarner (Kroaci), Tajfun (Slloveni) dhe Stuttgart (Gjermani).

Me transferimin e Simovicit, Peja e cila deri më tani i kishte tre të huaj në skuadër, tani e ka kompletuar numrin e të huajve në katër.

Kroati 27 vjeçar pritet që të arrijë nesër në Pejë dhe t’i fillojë menjëherë stërvitjet me ekipin.