TEAM OF THE WEEK
TOP 5-shja e javës në Superligë (24)
3 February, 2020 @14:16
Pas ndeshjeve të përfunduara të xhiros së 24 në Superligën e Kosovës në basketboll, TopSporti.com ka përzgjedhur pesëshen e javës bazuar në performancat individuale të lojtarëve.
Ekipin e javës e përbëjnë: Stevie Clark (Bashkimi), DJ Hanes (Trepça), Alante Fenner (Trepça), Samir Zekiqi (Ylli) dhe Terik Bridgeman (Bashkimi).
Në derbin lokal të Prizrenit, Bashkimi e mposhti skuadrën e Prizrenit pas vazhdimeve. Më të mirët te portokallezinjtë ishin Stevie Clark dhe Terik Bridgeman.
Clark shkëlqeu me 33 pikë (shifra më e lartë e xhiros), 7 kërcime, 5 asistime e 3 topa të rrëmbyer, derisa Bridgeman luajti me 24 pikë e 9 kërcime, kurse duke shënuar nga vija e treshit në sekondat e fundit, e dërgoi ndeshjen në vazhdime.
Trepça e befasoi Pejën duke e mposhtur me rezultat 95-79. Më të dalluarit te skuadra mitrovicase ishin Alante Fenner dhe DJ Hanes. Fenner luajti me 27 pikë, 5 kërcime e 5 asistime, derisa Hanes me 25 pikë, 8 kërcime e 5 asistime.
Pesëshen e javës e mbyll Samir Zekiqi i Yllit me 24 pikë e 8 kërcime në derbin e fituar kundër Rahovecit.