Trepça tërheq ankesën ndaj Pejës

Skuadra e Trepçës ka tërhequr ankesën ndaj Pejës në lidhje me shfrytëzimin e qendrës malaziase Radomir Marojevic në ndeshje ndaj tyre. 

“Kemi tërhequr ankesën për hir të basketbollit. Nuk kemi dashur të pengojmë Pejën në ligën ballkanike,” është cituar të ketë thënë sekretari i klubit të Trepçës, Kemajl Muja, për Kohën Ditore sot. 

Trepça pohoi ditë më parë se Marojevic nuk ka fletëlëshim nga ekipi i tij i mëparshëm dhe praktikisht nuk ka të drejtë loje, ku insistoi për fitore zyrtare në tavolinë ndaj Pejës. 

Në anën tjetër, kreu pejan kishte thënë se çështja Marojevic ishte pak më ndryshe nga të tjerat pasi që ekipi i tij i mëparshëm nuk kishte dhënë fletëlëshimin dhe nëse për 7 ditë nuk e dorëzon atëherë lojtari shpallet automatikisht i lirë dhe çështjen e rregullon FIBA. 

Marojevic nuk ka pasur të drejtë lojë në derbi ndaj Sigal Prishtinës, të cilën e humbi Peja, derisa para takimit me Trepçën ai kishte luajtur në ndeshje të ligës ballkanike, ndaj Kumanovës. 

Trepça përjetoi humbjen e parë të stinorit ndaj Pejës në Karagaç 88-71, derisa Marojevic regjistroi 9 pikë e 3 kërcime në këtë ndeshje.