Trepça thotë se Koljevic ka qenë destruktiv

Pas largimit të njëri ndër basketbollistëve më të dalluar të skuadrës, Ivan Koljevic, ka reaguar KB Trepça.

Ekipi mitrovicas ka bërë të ditur se lojtari është treguar destruktiv, derisa ka fyer si bashkëlojtarët ashtu edhe trajnerin, për të treguar më tej se lojtari është larguar pa asnjë paralajmëri, duke shkuar se shkon për arsye familjare.

“Të vetëdijshëm se rezultati i ndeshjes me Vëllaznimin ishte dëshpërues për tifozët tanë të shumtë e të zjarrtë, mund të garantojmë të gjithë që po angazhohemi për ta mbajtur klubin dhe skuadrën në nivelin më të lartë.
Si pjesë e këtij synimi, kryesia e klubit ka analizuar gjendjen në skuadër dhe sjelljet dhe angazhimin e akterëve para, gjatë dhe pas ndeshjes me Vëllaznimin. Pas analizës së thuktë dhe shqyrtimit të të gjitha fakteve, kryesia e klubit ka vendosur të shkëpus kontratën me basketbollistin Ivan Koljeviq. Ai gjatë dhe pas ndeshjes me Vëllaznimin ishte destruktiv në raport me skuadrën. Ka fyer kryesinë, trajnerin dhe lojtarët e tjerë. Është hera e dytë që lojtari në fjalë bën sjellje jo të mira dhe jo të pranueshme. Hapësirë për falje më nuk ka, sidomos pas postimit të tij të fundit. Pa biseduar as me kryesinë e as me asnjë anëtar të klubit ai deklaron se shkon për shkaqe familjare, gjë që nuk është e vërtetë.
Të gjithë që vinë në klubin tonë duhet ta kuptojnë që duhet respektuar fanella dhe qyteti, sepse ky qytet ka bërë shumë sakrificë për Trepçën tonë.” ka shkruar komunikata e klubit mitrovicas.