Vëllaznimi paralajmëron rikthim më të fortë

Skuadra e Vëllaznimit, që dje zhvilloi duelin e fundit të stinorit 2020/21 në Superligë, ka paralajmëruar përmes një postimi në Facebook, që ekipi do të rikthehet edhe më i fortë në të ardhmen.

Vëllaznimi është rikthyer në Superligë në njërin ndër stinorët më të mirë që ka pasur ndonjëherë Superliga dhe përkundër 9 fitoreve në stinor të rregullt nuk ka arritur t’i ikë zonës së rënies nga liga.

“Edhe pse klubi ynë ka arritur që të shënojë nëntë fitore, kjo nuk mjaftoi që të largohemi nga fundi i tabelës. Ne do të jemi gjithmonë mirënjohës lojtarëve që në çdo ndeshje dhanë maksimumin nga vetja dhe nuk u dorëzuan asnjëherë. Poashtu, trajnerët pa u lodhur bënë punë fantastike. Falenderimi i veçantë u shkon kryesisë dhe sponsorëve, që ndihmuan klubin në ditët më të vështira. Vëllaznimi do të rikthehet edhe më i fortë,” ka shkruar njoftimi i klubit gjakovar botuar sot, një ditë pas ndeshjes së 28 të stinorit, ku kuqezinjtë u mposhtën nga Peja.

Vëllaznimi ka arritur të befasojë disa herë ish-kampionët e Superligës në këtë stinor, ndërsa shumë ndeshje i humbi me rezultat të ngushtë.