Zekaj 35 pikë, Istogu fiton në Prishtinë dhe ngritet në renditje

Skuadra e Istogut ka arritur të shënojë një fitore të madhe dhe tejet të rëndësishme në Prishtinë sonte, duke e mposhtur MarigonaHill Prishtinën me rezultat të ngushtë 71-74 [18-21, 17-24, 15-13, 21-16].

Përballja që nisi më mirë për Istogun e drejtuar nga Fikret Shatri, u mbyll me epërsinë e troftave në pjesë të parë, që kishte diferencë 10 pikë [35-45].

Në pjesë të dytë edhe pse lojtarët e Dritëro Sefajës kërkuan më shumë dhe arritën që t’i fitonin të dy çerekët e mbetur, ata nuk arritën shkrirjen e tërësishme të epërsisë nga pjesa e parë dhe kështu përjetuan humbjen e dytë të stinorit.

TABELA AKTUALE

Më efikasi te Istogu ka qenë Mirlind Zekaj. Zekaj ka shënuar 35 pikë në fitoren e skuadrës që në total dha 74 pikë!

Përveç tij u dalluan edhe i zakonshmi Diamant Shabani me 17 pikë e 13 kërcime si dhe Labinot Kelmendi që shtoi 11 pikë në fitore.

Te MH Prishtina më efikasi ishte Visar Ejupi që dha 23 pikë.

Me këtë fitore, Istogu ngritet në pozitë të katërt në tabelë, përkundër se ka një ndeshje më pak të zhvilluar. E sa i përket MH Prishtinës, ajo ka bilans 5-2 tash.