Balkan merr biletën e fundit pë Final Four

Balkan Botevgrad, që nuk e kishte lënë Pejën që të sigurtonte një vend në TOP 6 të ligës ballkanike, ka arritur që sonte të kualifikohet në Final Four të kësaj gare. 

Bullgarët kanë mposhtur Teodon e Tivatit si vendas në palestrën e tyre të re me rezultat 68-55 për të dalë te katërshja e fundit e BIBL. 

Kontrolli i ndeshjes gjatë gjithë kohës ka qenë te ekipi bullgar, derisa malaziasit i bënin ballë vetëm falë dyshes së tyre fantastike, Savo Djikanovic dhe Nikola Vucurovic. 

Sidoqoftë, në fund Balkan arriti fitore edhe në takimin e dytë mes këtyre skuadrave në përballjen e fundit të TOP 6 dhe siguroi Final Fourin e Balkan League. 

Ivan Lilov dhe Pavel Marinov kanë qenë basketbollistët më efikas të ekipit të Balkanit me 15, përkatësisht 12 pikë të shënuara. 

Derisa te Teodo, dyshja e lartpërmendur, Djikanovic dhe Vucurovic kanë qenë më të dalluarit. Djikanovic arriti double-double prej 27 pikëve dhe 13 kërcimeve, derisa Vucurovic 14 pikë.