Banka rezervë e bëri dallimin

Pas eliminimit nga BIBL, trajneri grek i Tiranës, Antonios Doukas, në deklaratën e tij pas ndeshjes ka thënë që ekipi i tij ka qenë i mangët në bankën rezervë, gjë që e ka bërë dallimin në duelet e Play-Offit ndaj Levskit dhe bardhekaltërve i kushtoi me eliminim.

Ndër të tjera ai ka shtuar se në këtë stinor jo vetëm Tirana si ekip, por edhe ai si trajner kanë marrë përvojë shumë të rëndësishme nga gara dhe kjo do t’i ndihmojë jo vetëm ekipit të Tiranës, por edhe basketbollit shqiptar në përgjithësi.

“Natyrisht që ndonjëherë nuk mjafton të dëshirosh diçka, por duhet të jesh i aftë edhe ta bësh atë. Nëse i shikoni bankat rezervë të ekipeve do të kuptoni dallimin. Jo vetëm te lojtarët, por edhe te stafi i trajnerëve,” ka thënë Doukas për faqen zyrtare të BIBL.

SKEMA E PLAYOFFIT NË BIBL

“Ka qenë e rëndësishme ajo që kemi bërë këtë stinor. Kemi bërë një hap përpara në krahasim me vitin e kaluar dhe për këtë të gjitha meritat duhet t’i shkojnë lojtarëve, bordit dhe menaxhmentit të skuadrës,” ka shtuar ndër të tjera ai.

Tirana, pasi që siguroi Play-Offin (çerekfinalen e garës) luftoi për Final Four me ekipin bullgar, Levski, nga e cila u eliminua duke u mposhtur në të dyja ndeshjet, brenda dhe jashtë.