Bashkimi, gjysmëfinalisti i fundit

Bashkimi është gjysmëfinalisti i fundit i IPKO Kupës së Kosovës. Ekipi nga Prizreni e mposhti Dritën me rezultat 120-93, për t’iu bashkuar gjysmëfinalistëve të tjerë, Sigal Prishtinës, Pejës dhe Besës në luftë për ta fituar kupën.

Prizrenasit të cilët e kishin kontrollin e lojës gjatë pjesës së parë të ndeshjes, shpërthyen në çerekun e tretë kur krijuan seri prej 10-0 në fillim të kësaj periudhe, e më pas e thelluan epërsinë deri në 21 pikë (75-54) me anë të pikëve të Endrit Hysenagollit.

Falë lojës efikase të Hysenagollit dhe trepikëshave të Zeljko Jovanovicit, Bashkimi hyri i qetë në çerekun e katërt pranë rezultatit 88-72.

Dilema e fituesit përfundimisht mbaroi me fillimin e çerekut të fundit të ndeshjes, kur basketbollistët e Bashkimit me një super-seri prej 17-0 brenda 5 minutave të para të këtij çereku, arritën të fitojnë me rezultat të thellë 120-93.

Katër lojtarë te Bashkimi e përmbyllën ndeshjen me mbi 20 pikë, ndërsa më së shumti u dallua Hysenagolli me 26 pikë e 11 kërcime.

Te Drita më të mirët ishin Shamar Coombs me 26 pikë dhe Hannibal me 18 pikë e 11 kërcime.

Nesër do të luhen dy ndeshjet gjysmëfinale të Kupës, ndërsa çiftet gjysmëfinaliste do të mësohen pas shortit që do të hidhet sonte.

Statistikat ekipore

Statistikat individuale te Bashkimi

Statistikat individuale te Drita