Bashkimi humb gjasat për gjysmëfinale

Gjysmëfinalja e Ligës Ballkanike do të luhet pa skuadrën e Bashkimit.

Ekipi prizrenas i ka humbur gjasat për të shkuar tutje, pasi është mposhtur në shtëpi para një numri jo shumë të madh të shikuesve nga skuadra e Mornarit.

Ndeshja filloi me pikët e mysafirëve, ndërsa ndryshe nga çereku i parë, ku herë njëra e herë tjetra skuadër kalonte në epërsi, në çerekun e dytë dhe të tretë Bashkimi u tregua paksa më dominant, megjithëse dallimi në rezultat nuk arriti më shumë se nëntë pikë (58-49), që ishte edhe epërsia më e lartë në këtë takim.

Kjo epërsi gradualisht u ngushtua dhe në gjysmë të çerekut të katërt pas një kohe të gjatë mysafirët arritën të kalojnë në epërsi me pikët e amerikanit Lamont Jones.

Dy minuta e gjysmë para fundit, trepikëshi i Marko Mijovicit ia prishi përqëndrimin e Bashkimit, ndërsa më pas u rrit epërsia e mysafirëve në gjashtë pikë me kundërsulmin e shpejtë të Marko Mugosas.

Më pas vendasit u këndellën me lituanezin Rokas Uzas, i cili me pikët e tij të njëpasnjëshme i dha frymë ekipit të tij, duke e shndërruar në dramë të vërtetë fundin e takimit, pasi vetëm 37 sekonda para fundit rezultati u barazua në 74-74.

Megjithatë në fund Mornari u tregua më i vëmendshëm dhe arriti t​a fitojë takimin me rezultat 74-80.

TABELA AKTUALE

Lamont Jones i Mornarit ishte koshashënuesi më i mirë i ndeshjes me 25 pikë të shënuara, derisa kontribut të rëndësishëm për ekipin malazias dhanë edhe Robert Sampson dhe Balsa Radunovic që luajtën me double-double.

Te Bashkimi më i dalluarit ishin Rokas Uzas, Tay Waller dhe Theron Bussey, që shënuan përkatësisht nga 20, 19 dhe 16 pikë.

Kjo është humbja e katërt e Bashkimit në grupin C, ndërsa Mornari ka tre fitore e dy humbje, dhe së bashku me Beroen dhe Teodon do të vazhdojnë luftën për të siguruar gjysmëfinalen.

Statistikat ekipore

Statistikat individuale te Bashkimi

Statistikat individuale te Mornari