Berisha, mirë për Kosovën!

Basketbollisti më i mirë në vend, Dardan Berisha, ndryshe nga shumica e basketbollistëve kosovarë, do të ketë një verë shumë më të ngarkuar.

Berisha është përfshirë në listën prej 16 basketbollistëve të përfaqësueses së Polonisë, e cila do të jetë pjesëmarrëse e Kampionatit Europian, Eurobasket 2015, që do të organizohet në katër shtete të ndryshme, Kroaci, Francë, Gjermani dhe Letoni.

Berisha, ftesën e tij nga përzgjedhësi i polakëve, Mike Taylor, e ka vlerësuar shumë pozitive, jo vetëm për të, por edhe për basketbollin kosovar.

“Më e rëndësishmja është se kam të drejtë të luaj për Poloninë në Eurobasket, pasi Kosova ekipin do ta paraqet në nëntor. Kjo është shumë mirë jo vetëm për mua, por edhe për basketbollin e Kosovës, për shkak se është ftuar një lojtar nga Liga e Kosovës,” tha ‘Dali’ për të përditshmen Koha Ditore sot.

Ditë më parë, drejtori sportiv i Sigal Prishtinës, Florian Miftari, kishte konfirmuar se ftesa e Polonisë nuk do ta pengojë yllin e bardhekaltërve të luajë për Kosovën në të ardhmen, derisa edhe vetë basketbollisti disa herë është deklaruar se në mendje gjithmonë e ka përfaqësuesen e Kosovës.

Eurobasketi 2015 do të zhvillohet nga data 5 shtator, ndërsa ekipi përfaqësues i Polonisë pritet t’i fillojë përgatitjet nga 20 korriku.