Broja në sekondën e fundit, nxjerr pikë për Dritën ndaj Prishtinës

Pesëmbëdhjetë minuta para fundit të ndeshjes, dukej se Prishtina po shkonte drejt fitores në derbi ndaj Dritës në “Fadil Vokrri”! Kjo pasi që Drilon Islami kishte rrëmbyer topin e Albert Dabiqajt në mes të fushës dhe duke vazhduar drejt për në 16-shen e kundërshtarit shënoi bukur për 3-1, 14 minuta pasi që Besnik Krasniqi nga penalltia i kishte dhënë shpresa Dritës kur shënoi për 2-1!

Por, Dabiqaj “lau veten”. Ai u gjet në vend të duhur, kur Drita që në sulmin tjetër pas golit të Islamit shënoi. Zëvendësuesi Veton Tusha provoi bukur nga këndi i 16-shes, Ardit Nika e mbrojti mezi, por topin e dëbuar Besnik Krasniqi e shtyu pak, mjaftueshëm sa Dabiqaj të kthejë përsëri disanvatazhin në një gol, 3-2!

Pjesa e dytë u dominua nga Drita, pas pjesës së parë që plotësisht i takoi Prishtinës dhe mori epërsinë 2-0 pas 45 minutave të para. Tepër afër fitores ishte Prishtina e Jean-Michel Cavallit, por kapiteni i mysafirëve në minutën e fundit të kohës shtesë shënoi për barazimin 3-3! Ndeshja thuajse kishte përfunduar. Një top i gjatë nga mbrojtja, para zonës së rreptësisë një krosim, që u dëbua dhe arriti në këmbët e Rron Brojës - i cili pa menduar fort, goditi me të majtën me prekje në tokë, për të mos i dhënë rast Ardit Nikës për më shumë.

Liderja Drita kështu kaloi derbin pa humbje, ndërsa ngriti kuotën e pikëve në 44! Prishtina humbi mundësinë që të dalë mbi Malishevën në pozitë të tretë të renditjes me ndarjen e pikëve në fund. Mbeti e katërta me 29 sosh nga 20 ndeshje.

Axel Gnapi, sulmuesi i ri i Prishtinës kishte shënuar një gol që iu anulua nga VAR për “fije floku” (64’) ndërsa pati edhe një mundësi të mirë kah fundi i ndeshjes (90’+2), por goditja me kokë shkoi mbi portë. Ai tregoi se mund të bëj dallimin në sulm. Leotrim Kryeziu që shënoi golin e parë të Prishtinës, në fillim të ndeshjes nuk kishte arritur ta shënonte penalltinë, që e mbrojti Faton Maloku, kur rezultati ishte 0-0 (10’).

Kryeziu më pas i dha avantazhin Prishtinës nga një tollovi në zonë, ndërsa pas tij i riu Diar Halili shënoi super-gol kur goditi nga rreth 30-metra dhe me pak devijim të Juan Mesës, çoi në këmbë ata pak publik që kishin shkuar për spektakël në “Fadil Vokrrin” me temperatura dimërore! Prishtina - Drita 3-3 [Leotrim Kryeziu 25’, Diar Halili 35’, Drilon Islami 75’ - Besnik Krasniqi 61’pen., Albert Dabiqaj 77’, Rron Broja 90’+5].

Prishtina është ekipi me më së shumti barazime në Superligë, ndërsa me sot numri i barazimeve ka shkuar në tetë për kryeqytetasit. Drita, regjistroi barazimin e pestë, ndërsa ndjekësi i parë i saj Ballkani ka mundësi që nesër t’i afrohet në tabelë nëse fiton. Kampionët nga Suhareka kanë aktualisht 8 pikë më pak se liderja nga Gjilani, ndërsa me fitore këtë do ta zbrisnin në 5!