Çerekfinalet e Euroligës: CSKA Moska – Baskonia Vitoria Gasteiz

Kampionia aktuale përballë rebelimit bask. Parashikimi: 3-1

Kampionia aktuale, CSKA-ja e Moskës ishte fenomenale në startin e stinorit duke shënuar 6 fitore radhazi apo 12 fitore në 13 ndeshjet e para. Pasoi një rënie momentale me 3 humbje rresht, u rikthye, por konsolidimi i Realit nga ana tjetër hapi një rrugë të vështirë për ta në drejtim të pozitës së parë në tabelë.

Mungesa e Nando de Colos në atë periudhë humbjesh, kombinuar me disa probleme të lehta shëndetësore më pas të arkitektit të lojës së tyre, Miloš Teodosićit, ishte vendimtare në ndaljen e përkohshme. Këtë më së miri e shpjegon që Nando de Colo është shënuesi i dytë më i mirë i ligës me 20,1 pikë për ndeshje, kurse Teodosići është asistuesi më i mirë me 7,2 asistime për ndeshje.

Vazhdimësia dhe mosndryshimi i strukturës është arma më e fuqishme e ekipit moskovit. Trajneri Dimitris Itoudis krijoi një bërthamë të fortë lojtarësh që kombinoi një mbrojtje të fortë dhe zgjedhje të shumta në sulm. CSKA-ja është ekipi me mesatare më të lartë pikësh (87,3 për ndeshje) dhe asistimesh (20,39 për ndeshje), si edhe me përqindjen më të mirë të shënimeve nga gjuajtja e lirë (81,6%) dhe për tri pikë (40,6%). Se historia dhe përvoja është në anën e rusëve dëshmon fakti që atyre u ka ikur vetëm një herë Final-fouri në 14 stinorët e kaluar.

Baskonia nga ana tjetër nuk është aq e rregullt në paraqitjet në fazën finale, por gjithsesi ka qenë në katërshen finale të vitit të kaluar. Baskonia pati shumë rënie gjatë stinorit, me një periudhë të fuqishme në mes, pastaj rënie madje në pozitat jashtë atyre që çonin në play-off. Por, arriti të triumfonte në 5 prej 7 ndeshjeve të fundit dhe ta gjente veten në fazën finale.

Baskonia shënon shumë pikë në udhëtime, gjë që mund të jetë inkurajuese për vizitat në Moskë. Baskonia nuk ka një lider të vërtetë, por Shane Larkin, Tornike Shengelia dhe Adam Hanga duken të jenë lojtarët kyç të ekipit. Përgjegjësia për shënime dhe mbrojtje është e shpërndarë në mënyrë uniforme, prandaj ekipin e karakterizon kolektivi, i udhëhequr nga njëri prej trajnerëve më të rinj të ligës, Sito Alonso.

SKEMA EUROLEAGUE PLAY-OFF

Edhe në këtë duel, ekipet kanë qenë të zotë në fushat e tyre duke e mposhtur kundërshtarin. CSKA-ja shënoi fitore të thellë në Moskë, kurse Baskonia mposhti me një pikë dallim CSKA-në në Vitoria. Besoj që Baskonia, me kryeneçësinë dhe shkëndijat e vendosmërisë që shpesh i tregoi në sezonin e rregullt, mund të marrë një fitore në fushë të vetë, po më tepër se kjo, do të ishte, po ashtu, befasi.

info: