Çfarë Rahoveci, përmbysje për lidership!

Në ndeshjen e zhvilluar sonte mes dy prej skuadrave pa humbje në Superligën e Kosovës në basketboll, triumfuese doli skuadra mysafire, e cila fitoren sonte e arriti falë një çereku të katërt fantastik.

Ndeshja kaloi me luftë tejet të fortë mes të dyja skuadrave, derisa ishte Ylli skuadra që kishte epërsi të lehtë për pjesën më të madhe të ndeshjes. Gjithsesi, një përmirësim masiv i Rahovecit në çerekun e fundit ndryshoi gjithçka. Duke shënuar plot 31 pikë dhe duke pranuar vetëm 17 në 10 minutëshin e fundit, ‘vreshtarët’ rikthyen gjithçka në favorin e tyre dhe arritën ta mbyllin ndeshjen me rezultat 83-89, për të kaluar kështu në krye të tabelës, të paktën deri nesër, kur Prishtina dhe Prizreni i zhvillojnë ndeshjet përkatëse të xhiros së tretë.

TABELA AKTUALE

Më i dalluari te Ylli sonte ishte Robert Jones III me 22 pikë, 6 kërcime e 2 asistime, kurse te Rahoveci, ku 5 lojtarë patën pikë dyshifrore, më i dalluari ishte Arian Qallaku me 25 pikë, 5 kërcime e 3 asistime.

Xhiron e ardhshme, Ylli i shkon Prizrenit, kurse Rahoveci Trepçës në Mitrovicë.

Përndryshe, me përmbysje interesante sot kaloi edhe takimi mes Lipjanit e Trepçës, duke na bërë që të shpresojmë që sivjet do ta shohim një sezon më atraktiv të Superligës së Kosovës në basketboll.