LIPJANI - TREPÇA
Përmbysje fantastike për fitore historike!
6 October, 2018 @16:42
Në duelin e skuadrave që nuk kishin asnjë fitore të shënuar sivjet, duel ky hapës i xhiros së tretë të Superligës së Kosovës në basketboll, fituese doli skuadra vendase, për të cilën kjo fitore është historike, pasi që është e para në histori të klubit në kuadër të elitës së basketbollit kosovar.
Përkundër epërsisë 31-42 pas pjesës së parë, basketbollistët e Trepçës ranë nga loja dukshëm në pjesën e dytë, e kjo ndikoi që rezultati të përmbyset dhe ndeshja të mbyllet me fitoren e Lipjanit.
Tejet i mirë për Lipjanin ishte çereku i tretë, çerek në të cilin kjo skuadër shënoi plot 14 pikë dhe pranoi vetëm 6, për ta ngushtuar rezultatin në 46-47, rezultat i cili e bëri çerekun e katërt ‘të nxehtë’, E në 10 minutëshin e fundit, një seri 7-0 e Lipjanit bëri që epërsia të kalonte te vendasit, epërsi e cila u ruajt deri në fund dhe Lipjani e mbylli ndeshjen me rezultat 65-59.
Më i dalluari në këtë përmbysje fantastike të Lipjanit sot ishte Mavrice Williams me 17 pikë, 11 kërcime e 3 asistime, kurse te Trepça u veçua Dwane Miner me 18 pikë, 4 kërcime e 1 asistim.
Rrjedhimisht, pas 3 xhirove Lipjani ka bilanc 1-2, kurse Trepça 0-3.
