Bashkimi zyrtarizoi Cappsin

Ashtu siç paralajmëruam tre ditë më parë. Bashkimi mbrëmë zyrtarizoi basketbollistin e ri të skuadrës, Jordan Capps Marshall si shtesë në skuadër.

TopSporti ditë më parë kishte raportuar se portokallezinjtë prizrenas që nisën stinorin 2018/19 me të gjitha humbje, janë duke e shikuar dhe në bisedime me përforcimin e radhës në skuadër.

Kështu, mbrëmë u zyrtarizua Capps i cili është lojtar polivalent dhe ka specialitet pozitën e alos. Ky ka qenë së fundi lojtar i South Eastern Lousianas në NCAA, ndërsa te ekipi kampion i Kosovës vjen direkt nga kolegji.

Capps 23 vjeç ka pasur mesatare prej 13.4 pikëve, 0.5 asistimeve, 0.5 topave të rrëmbyer dhe 4.3 kërcimeve për ndeshje si pjesë e ish skuadrës së tij, ndërsa tash ai mund edhe të debutojë të dielën nëse kryhen procedurat e regjistrimit në FBK, në derbin lokal ku Bashkimi pret Prizrenin, të dielën.

Bashkimi këtë stinor ende nuk ka shijuar asnjë fitore në ndeshjet zyrtare të zhvilluara. Portokallezinjtë kanë humbur Superkupën nga Prishtina para fillimit të stinorit, ndërsa më pas kanë pësuar radhazi nga Ylli e Rahoveci në kuadër të Superligës.

Të dielën prej orës 17:00 Bashkimi pret Prizrenin në Sezai Surroi, në derbin e parë lokal të qytetit këtë edicion 2018/19.