Në Prizren, me derbi lokal

Paksa e çuditshme, por kampioni aktual i Kosovës, KB Bashkimi, do të duhet që të kërkojë fitoren e parë të stinorit ndaj ekipit të ri prizrenas në Superligës, KB Prizreni.

E këta të fundit, përkundër se po debutojnë në Superligë, janë ambientuar shpejt aty dhe kanë shënuar dy fitore në dy përballjet e para.

Ndeshja që do të quhet derbi lokal i qytetit të Prizrenit do të zhvillohet të dielën me fillim në ora 17:00 dhe do të transmetohet direkt në TV Klan Kosova, ka bërë të ditur FBK-ja sot.

NDESHJET E XHIROS III

Në përballjet tjera, duel tejet interesant pritet të zhvillohet në Suharekë. Ylli pret Rahovecin, derisa dy skuadrat që morrën pjesë në PlayOff stinorin e kaluar, tashmë kanë startuar pa humbje Superligën 2018/19 dhe njëra nga ta do ta pësojë të parën të shtunën në ndeshjen që nis prej orës 19:00 në “13 qershori”.

Nënkampionja e Kosovës, KB Prishtina, është mysafire e Boreas së Pejës në Gjakovë, të dielën me fillim në ora 19:00. Ndërsa dueli tjetër luhet mes Lipjanit dhe Trepçës, që nis në ora 15:00 në “Bill Clinton” në Ferizaj. Kjo ndeshje, njërën skuadër do ta bëj me fitore të parë të stinorit, pasi që të dyja i kanë humbur duelet e para në 2018/19.