BARAZOHET SERIA
Dallas befason Oklahomën
19 April, 2016 @8:45
Derisa tifozët e Oklahomës filluan festën me koshin në sinjalin e përfundimit të ndeshjes dhe epërsinë në seri prej 2-0, Dallas Mavericks gjeti momentin për të ‘vjedhur’ ndeshjen.
Pikët e Steven Adamsit pas rishikimit të sekondës së fundit nga referët e ndeshjes u anuluan dhe Dallas Mavericks triumfoi me 85-84 në ndeshjen e dytë të serisë ndaj Oklahmoës, për të barazuar serinë 1-1.
Dallas u mposht keq në ndeshjen e parë 108-70, kurse sot dhanë një paraqitje krejt tjetër derisa ndalën Oklahomën në vetëm 33.7 përqind të shutit.
“Jam shumë krenar me këta djem se si u përgjigjën në këtë përballje pas asaj që na ndodhi në ndeshjen e parë,” ka thënë trajneri i Dallasit Rick Carlisle pas ndeshjes.
Raymond Felton ka përfunduar ndeshjen me 21 pikë e 11 kërcime për Dallasin, ndërsa Dirk Noeitzki kontribuoi me 17 pikë të tjera.
Te Oklahoma preciziteti i Kevin Durantit ka qenë në nivel të ulët (më të ulët këtë stinor) duke shënuar vetëm 7 nga 33 tentime. Ai përfundoi ndeshjen me 21 pikë të shënuara.
Seria tash bartet në Dallas, ku do të zhvillohen dy ndeshjet e radhës.
