Dardan Berisha me dy dënime pas ndeshjes Peja - Ponte Prizreni

Basketbollisti i Pejës, Dardan Berisha, ka marrë dy dënime pas ndeshjes së zhvilluar të enjtën ndërmjet Pejës dhe Ponte Prizrenit.

Dardani përveçse luajti në këtë ndeshje dhe shënoi 26 pikë, si kapiten i skuadrës e kishte edhe rolin e trajnerit, për shkak të mungesës së kryetrajnerit Dragan Radovic dhe ndihmësit të tij, Petrit Zeqiri, të cilët janë të infektuar me Covid-19.

Sipas vendimit të Komesarit të Garave, Dardani është dënuar fillimisht me 150 euro për shkak të gabimit teknik si trajner, e më pas edhe me 100 euro të tjera për shkak të gabimit teknik si lojtar.

Gabimi teknik si trajner i është shqiptuar atij pas sjelljeve josportive të bankës pejane.

Ndeshja me Ponte Prizrenin përfundoi me rezultat 97-115 në të mirë të prizrenasve. (Shiko raportin e ndeshjes)