Denveri historik, eliminon Clippersat

Skuadra e Denver Nuggetsit, duke i mposhtur Los Angeles Clippersat me rezultat 89-104 në ndeshjen e shtatë të serisë, është kualifikuar në finale të Konferencës Perëndimore.

Denver Nuggets ishte 3-1 në disavantazh në seri dhe duke i fituar tri ndeshje rresht është kualifikuar për herë të parë që nga viti 2009 në finale të Konferencës.

Jamal Murray shkëlqeu me 40 pikë, 5 asistime e 4 kërcime, kurse Nikola Jokic luajti me triple-double prej 16 pikëve, 22 kërcimeve e 13 asistimeve.

Te Clippers Montrezl Harrell luajti me 20 pikë, derisa në humbjen e skuadrës ka ndikuar performanca e yjeve Kawhi Leonard dhe Paul George. Leonardi luajti me 14 pikë kurse George me 10. Që të dytë nuk arritën të shënojnë asnjë pikë në çerekun e fundit.

Denver u bë skuadra e parë në histori të NBA-së, që nga disavantazhi prej 3-1 në dy raundet e para, të kualifikohet në finale.

Në histori të NBA-së nga disavantazhi 3-1 në seri vetëm 11 herë ka ndodhur të kthehen skuadrat, Denveri këtë e arriti dy herë sivjet.

Denver Nuggets në finale të Konferencës Perëndimore do të përballet me Los Angeles Lakers. Ndeshja e parë e serisë do të luhet më 19 shtator.