Dinamoja rrëmben fitoren në pjesë të dytë

Dinamoja e Ferizajit, që në stinorin e kaluar ka qenë pjesë e Ligë së Parë - Grupi A dhe këtë stinor pa ndonjë shpjegim FFK e ka dërguar në Ligën e Parë - Grupi B, ka nisur mbarë dhe me fitore stinorin e ri në Ligë të Parë.

Ekipi i drejtuar nga Burim Qerkini pas pjesës së parë pa gola në “Xhemajl Ibishi” ndaj skuadrës së rënë nga Superliga, Fushë Kosovës ka shënuar dy herë në pjesë të dytë për të siguruar fitoren dhe për t’ia nisur me fitore stinorit, Fushë Kosova 0-2 Dinamo [Alban Çejku 57’, Besmir Fetahu 70’].

Të dyja golat e shënuara të Dinamos erdhën nga asistimet e mesfushorit Almedin Klinaku, që tregoi edhe njëherë se përkundër moshës (21vj.), ka qetësi në lojë dhe mund të kontribuojë në ngritje të ekipit.

TABELA AKTUALE

Fushë Kosova në anën tjetër nuk kishte atë entuziazmin që e pati në Superligë dhe në pjesë të dytë pasi pranoi golat nuk arriti të bëj më shumë për të shënuar së paku njëherë në rrjetën e kundërshtarit.

Dinamo pret Vjosën në xhiron e dytë të Ligës së Parë - Grupi B, ndërsa Fushë Kosova udhëton te 2 Korriku. Kujtojmë, Dinamoja në stinorin e kaluar ka arritur në barazh të Ligës së Parë për Superligë, por nuk kishte arritur të kalojë kundërshtarin nga grupi tjetër i Ligës së Parë, Prishtinën e Re.