Do të vazhdojmë me fitore

I lumtur me fitoren e radhës së Sigal Prishtinës, Antonis Constantinides, ka thënë se ekipi bardhekaltër do të vazhdojë edhe më tutje me serinë e fitoreve.

“Së pari dua t’i uroj ekipit mikpritës dhe shokut tim Lubo Minchev për lojën e mirë të treguar. Beroe po luan shumë mirë si në mbrojtje ashtu edhe në sulm,” ka thënë fillimisht trajneri qipriot i Sigal Prishtinës.

“Sa i përket ndeshjes, ne kemi më shumë përvojë në këto takime dhe ishim më të fokusuar gjatë ndeshjes. Kemi kontrolluar lojën, përveç disa rasteve në çerek të dytë. Sidoqoftë, është edhe një ndeshje dhe ne do të kërkojmë ta fitojmë edhe atë. Duam të vazhdojmë serinë e fitoreve,” ka shtuar ai.

Sigal Prishtina ka fituar me 14 pikë dallim ndaj Beroes në ndeshjen e parë gjysmëfinale dhe duhet ta ruajë këtë epërsi në përballjen e dytë për të arritur në finalen e dytë me radhë të BIBL.