Doellman në Kosovë apo jo?

Basketbollisti amerikan me 208 centimetra gjatësi që luan për Barcelonën në elitën spanjolle, Justin Doellman, këto ditë po përflitet se mund të jetë i huaji që do të natyralizohet për të qenë pjesë e përfaqësueses së Kosovës në basketboll, para kualifikimeve për Eurobasket 2017.

Doellman është 31 vjeçar dhe vjen nga Cincinatti i Ohios dhe luan si alo-qendër te ekipi katalonas.

Sidoqoftë, duke qenë se Borozani.com ka qenë i pranishëm në konferencën për shtyp të selektorit Arben Krasniqi kur shpalosi listën, ai është përgjigjur kështu:

“Basketbollistët e huaj me të cilët jemi në negociata, luajnë në elitën spanjolle të basketbollit. Por asnjëri prej tyre s’është pjesë e ekipeve që bëjnë pjesë në Euroligë,” kanë qenë fjalët e Krasniqit.

Barcelona është pjesë e Euroligës nga elita spanjolle. Nga elita spanjolle stinorin e kaluar në Euroligë kanë marrë pjesë: Barcelona, Real Madrid, Laboral Kutxa dhe Unicaja Malaga.

Burime të mediave të ndryshme brenda FBK-së bëjnë të ditur të kundërtën, duke shkruar se Doellman i Barcelonës është njeriu që do të jetë pjesë e Kosovës, derisa FBK nuk e pohon, por as që e mohon këtë.

Sidoqoftë, mbetet të shihet cili do të jetë basketbollisti i huaj që do të natyralizohet nga FBK.

Kosova bën pjesë për herë të parë në kualifikime për Eurobasket, pasi që u pranua me të drejta të plota nga FIBA, ndërsa kundërshtarë të grupit do të ketë: Slloveninë, Ukrainën dhe Bullgarinë.

Kualifikimet fillojnë me 31 gusht 2016 dhe përfundojnë në mes të muajit shtator, kur do të kuptohen rezultatet e Kosovës në debutimin ndërkombëtar në gara zyrtare në kualifikime për Eurobasket 2017.

Eurobasket 2017 do të mbahet në katër shtete të ndryshme: Rumani, Finlandë, Izrael dhe Turqi.

Emrat e ftuar nga Arben Krasniqi në grumbullin e parë të Kosovës janë përbërë nga lista e gjërë, ndërsa lista përfundimtare bashkë me 1-2 emra të huaj do të bëhet e ditur pas grumbullimit të parë të lojtarëve, që është përcaktuar të bëhet me datë 7 korrik.

Kosova ka aranzuar 11 ndeshje miqësore para ndeshjeve zyrtare kualifikuese për Eurobasket 2017.