BARDHEKALTËRIT
Farad Cobb, përforcimi i dytë i huaj i Prishtinës
11 August, 2016 @20:08
Basketbollisti amerikan, Farad Cobb, është përforcimi i dytë i huaj i Sigal Prishtinës për stinorin 2016/17, ka bërë të ditur vetë klubi bardhekaltër sot.
Cobb ka qenë pjesë e kolegjit të Cincinnatit në SHBA dhe ka luajtur në ligën NCAA. Ai është lojtar i pozitave 1 dhe 2.
Së fundi, ai ka pasur mesatare prej 10.7 pikëve, 1.8 kërcimeve dhe 1.7 asistimeve për ndeshje. Basketbollisti 23 vjeçar, 183 centimetra i gjatë, njihet për precizitetin e tij për trepikëshe, ku ka mesatare 40% të saktësisë.
Sigal Prishtina këtë javë ka nisur punën për krijimin e skuadrës së re për stinorin që vjen. Ata së pari emëruan malazezin Petar Mijovic në krye të skuadrës.
Pastaj zyrtarizuan Jabarie Hindsin, Granit Rugovën e sot edhe Cobbin, duke premtuar që në ditët në vijim do të ketë ende përforcime në skuadër, si nga tabori vendor, ashtu edhe ai i huaj.
Sigal Prishtina nga garat e huaja këtë stinor do të merr pjesë në FIBA Europe Cup dhe BIBL.
