KONTRATË 2 VJEÇARE
Kontratë 2 vjeçare për Granitin
10 August, 2016 @13:27
Basketbollisti i përfaqësueses së Kosovës, Granit Rugova, është rikthyer sot në folenë e tij te, Sigal Prishtina.
Rugova 30 vjeç, ka nënshkruar kontratë dy vjeçare me Sigal Prishtinën dhe ka thënë se është i lumtur që po kthehet te ekipi i tij.
“Jam i lumtur që u ktheva te Sigal Prishtina. Përveç një periudhe ku pata lëndim, unë tërë karrierën time kam qenë këtu.”- ka thënë Rugova.
Graniti gjithashtu ka falënderuar edhe ekipin e Bashkimit, ku kaloi stinorin e kaluar, që shërbeu për rikthimin e tij pas lëndimit.
“Me këtë rast falenderoj edhe ekipin e Bashkimit që më dha mundësinë që të kthehem nga lëndimi.” - ka shtuar ai.
Granit Rugova është në fakt prurja e dytë te bardhekaltërit, pasi që përveç tij, Sigal Prishtina dje zyrtarizoi edhe trajnerin Petar Mijovic, që stinorin e kaluar ishte i Bashkimit.
Gjithashtu, Sigal Prishtina zyrtarizoi disa orë më parë edhe përforcimin e parë të huaj për stinorin 2016/17, amerikanin Jabarie Hinds.
Sigal Prishtina do të garojë në BIBL, FIBA Europe Cup dhe elitën vendore të basketbollit në stinorin 2016/17.
