Jones bie nga kombinimi

Basketbollisti i natyralizuar i Kosovës, amerikani Shawn Jones, ka rënë nga kombinimi për kualifikime drejt Eurobasket 2017.

Federata e Basketbollit të Kosovës (FBK) përmes një njoftimi ka bërë të ditur listën e lojtarëve që do të udhëtojnë për në Itali dhe Jones nuk ka qenë pjesë e kësaj liste.

Në duelin e parë, Jones ka qenë në parket për 11 minuta dhe ka regjistruar 4 pikë, 3 kërcime dhe 1 asistim, ka mësuar Borozani.com, pasi që kjo ndeshje u zhvillua me dyer të mbyllura.

Kurse në të dytin, që ka qenë i hapur dhe është transmetuar, Jones ka kontribuuar me 5 pikë, 5 kërcime dhe 1 asistim.

Përveç Jonesit, që nuk ka treguar veten në miqësoret ndaj Estonisë, ditë më parë edhe Urim Zenelaj ka thënë se ka ‘lëshuar dorë’ nga përfaqësuesja pasi që nuk u provua për asnjë minutë në ndeshjet miqësore të Kosovës ndaj Estonisë.

Kosova u mposht në të dyja miqësoret ndaj Estonisë, të zhvilluara më 5 dhe 6 gusht në Talin, ndërsa Zenelaj ka qenë lojtari i vetëm që nuk fitoi asnjë sekond në parket nga përzgjedhësi Arben Krasniqi.

Në fazën e parë të grumbullimit të lojtarëve të Kosovës, nga kombinimi i Krasniqit për kualifikime në Eurobasket 2017 kishin rënë: Fahri Breca dhe Ergin Grosha.

Ndërsa siç mund të vëreni në listën e mëposhtme mungon edhe Jaren Sina, mirëpo për lojtarin në fjalë është thënë se ka shkuar në përgatitje me ekipin e tij në Japoni dhe do të zëvendësohet nga amerikani tjetër i përfaqësueses Scott Bamforth.

Kosova para kualifikimeve për Eurobasket 2017 që nisin më 31 gusht duhet të deponojë emrat e 12 basketbollistëve që do të bartin barrën gjatë ciklit dy javor të ndeshjeve ndaj Sllovenisë, Bullgarisë dhe Ukrainës.

LISTA e Arben Krasniqit për miqësoret në Itali: