Shumë shpejt, zyrtarizohen përforcimet

Përveç që prezentuan trajnerin e ri të ekipit sot, zyrtarë të Sigal Prishtinës kanë bërë të ditur se në ditët në vijim do të prezentojnë edhe përforcimet e reja të ekipit.

Edhe pse nuk kanë bërë të ditur se a janë forca vendore, apo të huaja përforcimet, Sigal Prishtina duket se tashmë ka nisur punën seriozisht për stinorin e ri, ku do të garojë në disa fronte.

“Shumë shpejtë do të kemi edhe befasi të reja në klub,” ka thënë fillimisht, zyrtari i klubit Luan Maloku, për të shtuar.

“Po, gjatë ditëve në vijim do t’ju bëjmë të ditura përforcimet e reja të skuadrës,” ka thënë ai.

Sigal Prishtina sot emëroi trajner të ri të skuadrës malazezin që e njeh mirë Superligën e Kosovës, Petar Mijovic.

Mijovic stinorin e kaluar ka qenë trajner i Bashkimit të Prizrenit dhe nuk vazhdoi më me klubin, përkundër se u vlerësua në tërë vendin.

Sigal Prishtinës iu largua trajneri i stinorit të kaluar, Antonis Constantinides, që fitoi titullin, Kupën dhe ligën ballkanike me ekipin bardhekaltër. Constantinides tha se për shkak arsyeve familjare duhet të qëndrojë më afër vendit të tij Qipros. Ndërsa një javë më vonë u zyrtarizua si trajner i ekipit elit grek, Rethymno nga Kreta. Ai njëkohësisht po punon edhe me kombëtaren shqiptare për kualifikime në Eurobasket 2017.

Në anën tjetër trajneri i ri i Sigal Prishtinës, Petar Mijovic ka theksuar se Sigal Prishtinës do t’i duhen së paku 5-6 lojtarë të mirë vendorë, pastaj atyre u duhet shtuar edhe 4 të huaj për të bërë një ekip të fortë që të garojë në të gjitha frontet për stinorin 2016/17.

Në ndërkohë drejtori, Luan Maloku, ka thënë se Sigal Prishtina tashmë do të punojë me basketbollsitë ndryshe, duke nënshkruar kontrata së paku 2-3 vjeçare, kurse ka theksuar se çdo lojtar është opcion që mund të vijë te Sigal Prishtina, pasi që është afati kalimtar dhe negociatat janë të hapura.