Foda për Kronen: “Aventura jonë nuk ka përfunduar”

Selektori i Kosovës, Franco Foda, i cili në dy javët e fundit u përfol për largim nga Kosova pasi që kishte marrë një ofertë të majme për të drejtuar një ekip nga Arabia Saudite, ka thënë se aventura e tij me Kosovën nuk ka përfunduar ende.

Laola austriake ka përcjellur njoftimin e dhënë nga Krone, të cilët kanë cituar kryetrajnerin e Kosovës, Foda të ketë thënë se me Kosovën asgjë nuk ka përfunduar.

“Aventura jonë nuk ka përfunduar ende. Unë dhe ekipi im dëshirojmë të zhvillojmë akoma gjërat këtu,” kanë qenë fjalët e trajnerit gjerman, që më parë ka drejtuar Austrinë, me të cilët ka arritur EURO-n.

Deklarata e Fodës vjen një ditë pas postimit të kreut të FFK-së Agim Ademi në rrjete sociale se ata kanë folur për ndeshjet e radhës dhe përkundër ofertës, ai nuk do të largohet nga posti i tij.

“Ka qenë një bisedë normale. Kemi folur për ndeshjet e radhës. Nuk kishte asgjë tjetër. Ai asnjëherë nuk tha që po largohet. Ka qenë vetëm një ofertë shumë e mirë për të,” kishte thënë Ademi.

Kosova është në prag të kualifikime për Botërorin e radhës “USCAME 2026”. Dardanët janë në një grup mjaft të vështirë për të arritur së paku edhe vendin e dytë që siguron playoffin për Botëror. Zvicra, Suedia dhe Sllovenia janë kundërshtarët e grupit të Kosovës, ndërsa duelet e këtij grupi do të nisin në shtator, për tu kuptuar në nëntor përfundimisht se cila skuadër do të merr biletën direkte tejoqeanike, e cila do ta kërkojë atë përmes playoffit.

Derisa Suedia është në ngritje si ekip, Zvicra është në rënie. Sllovenia ka ekip stabil dhe besohet që mund t’i shkaktojë telashe secilës. Kosova, llogaritet autsajder në këtë grup.