Gasol, më i miri i të gjitha kohërave

Sergio Scariolo, trajneri italian i përfaqësueses së Spanjës në Eurobasket 2015, pas triumfit të mbrëmshëm në finalen e Europianit ka thënë se Pau Gasol është lojtari më i mirë europian i të gjitha kohërave. 

Scariolo 54 vjeç, që ka drejtuar shumë skuadra europiane gjatë karrierës së tij si trajner duke nisur nga viti 1989 ka thënë këto fjalë për Marcan spanjolle. 

“Ai është lojtari më i mirë i të gjitha kohërave në basketbollin europian. Këtë nuk po e them se e kam pasur në ekip, por sepse ashtu është në realitet.” 

Gasol ka qenë shtylla kryesore e Spanjës për vite të tëra në basketboll, derisa tani në moshën 35 vjeçare ka bartur barrën kryesore të reprezentacionit për të rikthyer atë në maje të Europës. 

Qendra e Chicago Bullsit ka përfunduar Eurobasketin me mesatare prej 30 minutave të zhvilluara për lojë, 25.6 pikëve, 2.3 bllokadave, 2.9 asistimeve dhe 8.8 kërcimeve.